استفسار بسيط عن امراض القلب

**سماح طاهر** · 2009/8/16, 05:02 مساءً

قبل كل حاجة حابة اشكرك على كل المعلومات الجميلة دي ..... وبالجد
انا عندي اسئلة بسيطة :
1\ ارتخاء الصمام المترالي في القلب شنو اضرارو والاثار البتحصل للشخص المصاب وهل العمر بياثر على المرض او الحالة ؟
وانا قبل كده مشيت لاكتر من دكتور وكلهم قالوا مجرد عدم انتظام في دقات القلب ما اكتر
اخر دكتور مشيت ليهو قال انو عندي ارتخاء في الصمام المترالي واداني حبوب اتضح انها منظمة لدقات القلب برضو علما بانو انا عمري 18 سنة حاليا
2\ كمان عندي سؤال عن :
مرضى القلب لما الواحد يكون عامل دعامات بغض النظر عن نوعها (عادية او مغلفة بالدواء)
الاشياء اللي بتؤدي لانو يحصل انسداد في نفس مكان الدعامة شنو ؟
---وانا سامعة كمان انو اي مريض ومركب دعامات ما ممكن يعملوا ليهو عمليات كلى او زراعة او نقل اي عضو ؟ هل الكلام دا صحيح ؟ وايه الاسباب ؟؟؟؟؟
اتمنى تردي علي باسرع وقت ممكن
وياريت تنشروا معلومات عن امراض القلب عشان انا نفسي ادخل المجال ده واتمنى اطلع جرّاحة قلب
قولوا آآآآآآآآآآميييييييييييين

**نونواية** · 2009/8/16, 09:00 مساءً

عيوني ليك يا سكرة

ويا الف سلامة عليك

بس احب اطمنك انا زااااااااتي باخد حبوب تنظيم الضربات دي وتقريبا بديت اخدها وانا في بداية اولي جامعة يعني في نفس عمرك تقريبا واسباب عدم انتظام الضربات اسبابها كثيرة ومن صمنها امراض الصمامات بس الاكثر شوعا هي التوتر (anxiety) وبعض انواع الادوية وزيادة نشاط الجهاز العصبي وامراض القلب الاخري
فاذا تكرمت وارسلتي بقة الاعراض الت تشكين منها ربما اقدر اساعدك بالمعلومات اكثر
1- هل تشعرين بدقات قلبك؟ واذا نعم هل بتحسي انها قوية ام سريعة؟
2- هل الضربات دي مرتبطة بنشاط محدد؟ او كمية الاكل او الحالة النفسية؟
3- هل في ضيق في التنفس بالذات وانتي مرتاحة من غير بذل مجهود؟
4- هل توجد ا الام بالصدر او تورم بالاقدام؟
5- هل تشعلاين بنوبات دوخات او هبوط زي ما السودانيين بيقولوا؟
6- هل في فتور عام في الجسم؟
7- هل اصابتك في طفولتك التهابات متكررة للوز؟
واخيرا منذ متي معاك الضربات دي؟

ويا ست الكل يا رب يوفقك بس وصتي ليك اسالي الناس السبقوك في المجال عن الفوايد والمساؤي في المهنة وامشي حومي في نص الدكاترة واسالي كتير وبعدين كوني قناعتك حبيبتي ماشي؟

**نونواية** · 2009/8/16, 09:06 مساءً

المشاركة الأصلية كتبت بواسطة سماح طاهر

ارتخاء الصمام المترالي في القلب شنو اضرارو والاثار البتحصل للشخص المصاب وهل العمر بياثر على المرض او الحالة ؟

ارتخاء الصمام المترالي (Mitral Valve Prolapse) ما مرض خطير عادةً، ولكن قد تحدث مضاعفات مثل الالتهابات، وعدم انتظام في ضربات القلب، وقد يشعر المريض بصعوبة في التنفس، وخاصة مع المجهود، وما عليك إلا المتابعة الدورية عند طبيب القلب، فقد ينصح باستعمال منظمات الضربات (inderal) وجرعات من المضاد الحيوي في أوقات يحددها هو، مثل بعض العمليات والفحوصات الطبية، وخلع الأسنان؛ لحماية الصمام من الالتهابات.

المشاركة الأصلية كتبت بواسطة سماح طاهر

وانا قبل كده مشيت لاكتر من دكتور وكلهم قالوا مجرد عدم انتظام في دقات القلب ما اكتر
اخر دكتور مشيت ليهو قال انو عندي ارتخاء في الصمام المترالي واداني حبوب اتضح انها منظمة لدقات القلب برضو علما بانو انا عمري 18 سنة حاليا

ما وريتينا التشخيص الاخير فقط عن طريق الفحص السريري للطبيب ام انو عمل تخطيط للقلب وموجات صوتية ؟؟

صغنووووووووونة يا سكرة وما تقلقي انتي بس حافظي علي روحك وتابعي مع طبيبك بانتظام وما بتجيك حاجة

وبالنسبة للمعلومات عن امراض القلب اقول ليك حاااااااااضر حتلقيها في قسم الثقافة الطبية

**سماح طاهر** · 2009/8/18, 09:02 صباحاً

تسلمي يا عسل ومشكورة بالجد
تقريبا كل الاعراض دي عندي ما عدا اللوز والاورام يعني ضيق التنفس والدوخة لما يكون الجو مسخن زي الايام دي وتاني في كتمة وبحس بالدقات سريعة احيانا وفي دقة قوية شوية
الموضوع دا معاي من عمر 6 سنين من زماان والحبوب دي الانديرال انا كنت باخدها بس بعدين غيروها لي بحبوب لونها احمر
وعن التشخيص كل مرة بعمل موجات صوتية واشعة وفعلا قال لي لما تخلعي ضرس او تحشيهو ضروري تبلغي الدكتور عن الارتخاء
وشكرا مرة تانية يا عسل وحااااااااضر حأحوم بالدكاترة

**نونواية** · 2009/8/18, 07:15 مساءً

يا ربي يعينك يا حبيبة بس المهم انك لسة صغنونة وعيشي حياتك عادي الموضوع بسيط

بس لازم تحفظي نوعالادوية البتاخديها يعني حمرا وصغيرة وقسطيرتها لبنية دي ماااااااا بتنفع
وناقشي مع الطبيب بتاعك انواع العلاج المتوفرة بما فيها اصلاح الصمام بجراحة مفتوحة او مغلقة

**سماح طاهر** · 2009/8/18, 09:39 مساءً

هو كمان بقى فيها جراحات
اشهد ان لا اله الا الله وان محمداً رسول الله

**نونواية** · 2009/8/19, 03:52 مساءً

اعفي لي يا سكرة اذا كنت خلعتك انا اسفة بالجد بس للامانة المهنية كان لازم اوريك كل الاحتمالات الممكنة بس في النهاية الكلمة الاخيرة للطبيب الانتي متابعة معاه لانو انا مهما اديتك راي فعلي البعد او عبر المنتي ما حاككون عارفة اقدر بالضبط وضعك الصحي