كلمات اغاني الفنان كمال ترباس

[اسامه]

الملاك ", كلمات د " علي الكوباني

انا شفت الملاك ..
بأيدي سالمتوا..
بهرني بنورو ..
خلاني مأسورو ..
إن ضعت في بحورو ..
أنا عقلي فارقتوا ..

لو طلاك صباحوا ..
او ضماك جناحوا ..
حقيقة القلب بشفى ..
وتاني تطيب جراحوا ..
كمان لو شفته لونوا ..
سحرو الفي عيونوا ..
تدور ترحل في كونوا ..
من حسنو ولطافتوا ..

الراقي في وسامتوا ..
مرسومه ابتسامتو ا..
تفوق البدر صورتوا ..
أية الحسن هامتوا ..
دلال من غير تعالي ..
رقه وزوق مثالي ..
زي الدر بلالي ..
في أصلو وداعتوا..

من يوم ما ليقيتوا ..
كل الفات نسيتوا ..
في قلبي اصطفيتوا ..
دون الناس هويتوا ..
صار لحياتي معنى ..
في أحلامي جنه ..
بس الحظ تجنى ..
شال قلبي وسعادتوا ..
انا شفت المــــــــــــــــــــــــــلاك ..

[اسامه]

انت المهم
كلمات الشاعر عبد العال السيد


انت المهم الناس جميع ما تهمني
انت العزيز افرد شراعك ضمني
خايف تفوت والسكه بيك ما تلمني
انت الوداد
نبض الفؤاد
بستان نضير
وصفا وعبير
وجمال رهيب
ودلال عجيب
ريّح شقايا وجمّني
جاييك شعاع
نجمه وشراع
نسيني يا عمري الضياع
انا لسه تايه دلّني
قول ليا قول
يا احلى زول
خلي الحزن يرحل يزول
لو كنت جد بتعزّني
انا ليك وبيك
مداح عيونك ومشتهيك
مهما تجور بنزف واجيك
لا بقسى لا بزعل عليك
لانك انت تهمني

[اسامه]

كفاك ماتبكي يا عيوني

اتاريهم نسو الريده و نسوها حتي نسوني

كفاك ما تبكي يا عيوني

خلاص ما تبكي يا عيوني

اتاريهم نسو الريده و نسوها حتي نسوني

كفاك ما تبكي يا عيوني

خلاص ما تبكي يا عيوني

كفاك يا عيوني ما تبكي

كفاك يا عيوني ما تبكي

و جفاكي ما تسوقي خلاص ما تبكي يا عيوني

و ما تالمي و تشكي

ما تالمي و تشكي

الساب الحنان فكيه

و حقيقه الريده بتبكي

خلاص ماتبكي ياعيوني كفاك ماتبكي يا عيوني

اتاريهم نسو الريده و نسوها حتي نسوني



كفاك ما تبكي يا عيوني خلاص ما تبكي ياعيوني

كفاك ياعيوني ما تعبتي

كفاك ياعيوني ما تعبتي

حتي اليله ده غلبتيه

خلاص ما تبكي يا عيوني

منو نهيلتي و شربتي

منو نهيلتي و شربتي

سابك و ما حصل سبتي

خلاص ما تبكي يا عيوني كفاك ما تبكي يا عيوني

اتاريهم نسو الريده و نسوها حتي نسوني

كفاك ما تبكي يا عيوني خلاص ما تبكي يا عيوني

[اسامه]

عيونك فيها شئ يحير

عيونك فيها شئ يحير يغير من اتجاه الزول
يسهر في عيوناالنوم يودر قلبي في المجهول

رائيتك مره و اترائيت
علي جناح الخيال فريت رحلت بعيد و اضاريت
ﻻ بينت ﻻ وريت
هي رحلت بعيد و اضاريت ﻻ بينت ﻻ وريت
و عن انظاري اتواريت و خليت ليا في عنيا صوره زول
عيونك فيها شئ يحير يغير من اتجاه الزول

وصورتك جات قريب مني
حلاه مرسوم يكلمني
يمد الين يسالمني حديث الريد يعلمني
هي يعلمني يعلمني حديث الريد يعلمني
يناجني يفرحني يعلمني يساهر بيا ليلي يطول
عيونك فيها شئ يحير يغير من اتجاه الزول

[اسامه]

أمى .. الله يسلمك

ويديكى لى طول العمر..

وفى الدنيا يوم ما يألمك ..

امى .. الله يسلمك ..

* * *

أمى يا دار السلام

يا حصنى لو جار الزمان ،

ختيتى فى قلبى اليقين

يا مطمنانى .. بطمنك

أمى .. الله يسلمك

***

خيرك على بالحيل كتير ،

يا مرضعانى الطيبة بالصبر الجميل ،

سا سعد أيامى وهناى

لو درتى قلبى ، أسلمك.

أمى .. الله يسلمك

***

أنا مهما أفصح عن مشاعرى

برضو بيخونى الكلام

وقولة ( بحبك )

ما بتكفى وكل كلمات الغرام

يا منتهى الريد ومبتداه ..

يا الليا .. الله يسلمك ..

ويديكى لى طول العمر

وفى الدنيا يوم ما يألمك ..

أمى .. الله يسلمك ..

[اسامه]

جنا الباباي

جنا الباباي ياجنا الباباي
جنا الباباي يا جنا الباباي
مرة قبل جاي بالي في ريدك انت وينو نجاي يا

مالي بهواك وكتر هميا جنا الباباي ياجنا الباباي
انت عارف الشوق بجري في دميا جنا الباباي يا جنا الباباي
حقوا تفهمني انا ام نمي
حقوا تفهمني انا ام نمي
قصدي صورة معاك وتبقى مهتمي

جنا الباباي يا جنا الباباي
مرة قبل جاي مالي في ريدك انتا وينو نجاي يا

ليه امجد فيك وانتا ناسينيا جنا الباباي يا جنا الباباي
مالي زي ايوب ضري ماسينيا جنا الباباي يا جنا الباباي
لو عرفتا الحال ما بتكويني
لوعرفتا الحال ما بتكويني
اللي في ايدك مافي ايدينيا

جنا الباباي ياجنا الباباي
مرة قبل جاي مالي في ريدك انتا وينو نجاي يا

قلبي يحنو اليك وانتا مابتحن يا جنا الباباي يا جنا الباباي
وين ابل شكواي صبري منك ايا جنا الباباي يا جنا الباباي
راعي حرماني واخشى عامل السن
راعي حرماني واخشى عامل السن
اني ماشي كبير د بتسيبني اجن

جنا الباباي ياجنا الباباي
جنا الباباي ياجنا الباباي

[اسامه]

علمتني معنى الحياة

علمتني معنى الحياة يا أبو العيون الحلوة
علمتني معنى الحياة يا أبو العيون الحلوة

عرفتني سحر الجمال وين منبعو
سمعتني نغمو الجميل ما اروعو
شوفتا النجوم في سناياك يلمعو
لحظات واشراق الجمال ودعو
يا ابو العيون الحلوة

عرفتني أهوى الجمال وأقدسو
وأيقظ مشاعر الناس عليه لو كان نسو
حب الجمال زي الهوى البتنفسو
لكن بخاف من العيون لو كان قسو
يا أبو العيون الحلوة

يا آية من صور الجمال المشرقة
يا جزوة من نار الغرام المحرقة
يا نجمة في طول الليالي مؤلقة
وقلبي الرهيف بي علاك لمن ارتقى
يا أبو العيون الحلوة

[اسامه]

مــــلوك الــــــــــــعز

ليك حق باللون الفيك تعتز ليك حق باللون الفيك تعتز...

وتهز الناس بعيونك هز... وتهز الناس بعيونك هز

لو شايف روحك هي العاجباك .. لو شايف روحك هي العاجباك وحياتك أنحنا ملوك العز

الحسن الآثر بكرة بروح صدقني جمال الناس في الروح

الروح هي الوردة الما بتجف ... في أي عمر تلقها تفوح

اتنازل عن طبعك مرة وما تنسى الناس كدا بالمرة

تسرح في عيونك تتغزل ... تسرح في عيونك تتغزل

يوم تصحا يكون عمرك مرة

اتلما تعال على أحبابك ... خلي النوار يعرش بابك

أبسم لي الدنيا بتبسم ليك قبال ما يضيع لون عنابك

[اسامه]

صدقني ما بقدر اعيد ..
قصة غرام والشوق مضت ..
رحلة عذاب دابة انتهت كيف تاني ترجع من جديد..

من عمري اديتك كتير ..
اخلصت ليك وانت بتغير ..
و الغيرة كم فرقت دروب طريقها كان مخضر نضير..

من بدري خليتك انا..
و نسيت عشرة كم سنة..
ما انت ضيعت الهنا..
كل السعادة العندنا..
كتبت لي ريدنا الفنا و بقت النهاية المحزنة..

الليلة بتقول نبتدي..
لازم انا انسى الحصل و ليك اجي..
وافرح عمرنا وينتشي..
انت فاكر حبي ليك لسة يرن ..
انا حبي ليك بدري انتهى وزي الما كان بيناتنا شئ ..

اعذرني ما بقدر اعيد

[اسامه]

اديني من ريدك مدد

اديني من ريدك مدد ماالشوق بحرماليهو حد
اديني من ريدك مدد ماالشوق بحر ماليهو حد
انا في هواك درويش غرام ماالشوق بحر ما ليهو حد
مدد مدد مدد اديني من ريدك مدد
مالو ****فك يزور او مرة شخصك جاني جد
هي مالو طيفك يزور او مرة شخصك جاني جد
كان استرحتا من العذاب كان هلى لي نجم السعد
مدد مدد مدد اديني من ريدك مدد
يا ارقى من همس النسيم يااحلى من طعم الشهد
خايف عليك من العيون خايف عليك من الحسد
مدد مدد مدد اديني من ريدك مدد
انا هواك درويش غرام ماالشوق بحر ماليهو حد
مدد مدد مدد اديني من ريدك مدد
مرات اقول انسى العزاب اقفل كتابك للابد
القاك انسان للعيون ملكتنا الروح والجسد
مدد مدد مدد اديني من ريدك مدد
انا في هواك درويش غرام ماالشوق بحر ماليهو حد
مدد مدد مدد اديني من ريدك مدد

[اسامه]

أغالب دمعى واتصبر

اغالب دمعى واتصبر
واقول يالله صبرنى
على فراقك يا اغلى الناس
سواد حظى الملازمنى
مساهر وطرفى جافا النوم
اقول لو مرة طيفو يزور
اشوفو وطلعتو تفرح
تضوى سماى احلا بدور
اعيش لو لحظة بقربو
مناى اللحظة تبقى دهور
عظيم فيهو الدلال خايل
حبييبى الكلو نور فى نور
انا الحافظ ودادو سنين
انا الماخنت عهد الريد
انا الصابر عليك ياهم
وانا الوافى وهواى فريد
زمااااااان قالو الغرام قسمة
حقيقة القسمة بالايد
مصيرو الحى يعود تانى
ويهل فى سمانا اجمل عيد

[اسامه]

ياريت

ياريت ياريت ياريت ياريت
سألوني عن حبي انكرتا ما أقريت
شافوهو متخبي في عيون تقول ياريت
ياريت ياريت ياريت ياريت ياريت
لوكان حبيبي أباح واعلن عن هواه صرح
كان الفؤاد ارتاح وانا كنت ليهو مشيت
ياريت ياريت ياريت ياريت ياريت
حاولتا اكتب ليك واصور الاحســـاس
وأقول كلام في الريد زي النجوم والماس
تعبتا تعبتا القى حرووف ما سمعو بيها الناس
سبتا الكلام وبديت تاني اقول
ياريت ياريت ياريت ياريت ياريت
ياريتني اقدر ابوح واقليهو ياعمري انتا الحبيب الروح
لكني خايف اقول يبعد مني يروح
عشان كدا استكفيت وكفاية اني هويت
لما الحنين فاض بي تاني اقول
ياريت ياريت ياريت ياريت ياريت ياريت
ياريت ياريت ياريت ياريت
ياريت ياريت

[اسامه]

ماليا غيرك حياة
يا اسمر يا رمز الضياء
انت حياتى
يا فاهم يا دارس معنى الحياة
من ادبك ليك حارس من غير رياء
يا باسم ياناعس
يا ملاك يا لابس توب الحياء
انت حياتى
في حسنك الملون
وكم من سحر مكون
واحي النعاس الفي جفونك
واحي الظهر في عيونك
اعجبتا بيهو
ونظمتا فيهو
انتاحياتي
معلونك الاسمر
ورد الخدود محمر
لا بودرة لا احمر
الوان محاسنك زى ماءالحياة
ماشوهوك بفصادة
على الخدود السادة
طبيعى خلقة ربك
ما دايرزياد

[اسامه]

سيبني في عز الجمر ,سيبني في عز الجمر
انت من حولي تمر انت عارف انو عارف انو صبري فات حد الصبر
**** سيبني في عز الجمر****


كلو ماتلاقيني او على ما تهجرني
****سيبني في عز الجمر****
ماتكون بالقاسيوبالحنان شيلني
****سيبني في عز الجمر****
ماتقول حبيتك عشان كدا جاهلي
وما تقول حبيتك عشان كدا جاهلني
لو كنت ما مصدقنى مرة اتهملنى

****سيبني في عز الجمر****
انت من حولي تمر انت عارف انو عارف انو اه صبري فات حد الصبر سيبني في عز الجمر


ياغرام في بحورك كم من ياغرام فى بحورك كم تعب مجدافى
****سيبني في عز الجمر****
برضي في مشواري ماشي في اهدافى
**** سيبني في عز الجمر****
داير اعيش في ريدو وفي حنانو سابني
داير اعيش فريدو وفي حنانو سابني
اليالي بتضحك والحزائن مافي

****سيبني في عز الجمر****
انت من حولي تمر انت عارف انو عارف انو اه صبري فات حد الصبر سيبني في عز الجمر


ياظلام الليل العلي ما اديلوا
ياظلام الليل العلي ما اديلوا
طال بعاد افراحي والالم طال ليلو ياحليلو حنانا وريدنا بالوليلو
الخواطر تبكي و العيون كحيلو

****سيبني في عز الجمر ****
انت من حولي تمر انت عارف انو عارف انو اه صبري فات حد الصبر
****سيبني في عز الجمر****

[اسامه]

ماتهتموا للأيام

ما تهتمي للأيام ظروف بتعدي..
طبيعة الدنيا زي الموج تجيب وتودي..
ما تهتموا للايام..

وما تهتمي أصلو الناس حياتا ظروف ..
بتتعود تغير كل خط مألوف..
مصير الزول حياتو ياما فيها يشوف..
وفي دنيانا بنلاقي الفرح والخوف..
وما تهتموا للايام..

مصير الزول عشان يفتح طريق يادوب ..
بكون زادو البشيلو معاهو شوق مشبوب..
عشان يلقا إنتصارو يا زمن محبوب..
يضوق المرة ويتوشح بي صبر أيوب ..
ومهما تظلم الأيام ضياها الفال ..
وما تهتمي للأيام ظروف بتعدي

[اسامه]

بـتخيـــــــــــلـك


بتخيلك كل ما الصباح طل وبدا
بتخيلك في زرقة السما والمدى
كل ما الغروب لون خواطري و هدهدا
وكل ما ابتهجت وبلل اعماقي الندى

بتخيلك يا كرنفال حزني المضى
لما النجوم تغفى وتنوم
وانكسر خاطري و يموت فيني الرضا
بتخيلك زحمة فرح تملك حواسي و تبهجا
ونجدة غريق يتلاشى في جوف الدجى
لا قربو ساحل لا جزر لا طوق نجا

بتخيلك لمة صغار ونسة و حجى
و قمراً طلع ضو الدساتر و مهرجا
بتخيلك في كل شي لمن ابالغ وانتشي
لما تظلمني الخطى وابا المشي

و بتخيلك

[اسامه]

بقيت تنسى
كلمات حسن الزبير
ألحان كمال ترباس

من هسه وبقيت تنسى
دلايل الريد وكت تظهر
وحاتك ما بتدسى
شفنا عيونا بي عينيك
وما عدينا لي مرسى
شقى وغرق مشاعرنا
بحر أمواجوا ما بترسى
زمان كنت الحنان سيدو
وزمان ما كان بتتوصى
شقي البمسك درب ريدك
وراك قليبو بنقصى
تعال ناجينا حجينا
وأحكي عن الغرام قصة
قلوبنا صداها غطاها
زمن محتاجة لي لمسة

[اسامه]

اظلم من ظلم



كم شفت من مجهول مصير

وشفت ياما شفت كم

انا شفت ناس ظالمين كثير

بس أنت أظلم من ظلم

انا تانى ما بندم عليك

اصلو الندم بيفيد شنو ؟!

ولمتين انا اترجى فيك

الزيى كان رادك منو ؟!

لكن طباعك يا ضنين

لكن طباعك ما بتلين

جفوة ونفور وعذاب وسنين

وعمرو قلبك ما رحم

انا شفت ناس ظالمين كثير

بس انت اظلم من ظلم

**

يا دنيا ياما فيك ناس

بتقابل الريد بالجفا

يا دنيا ياما فيكى ناس

اتعلمت قل الوفا

ويا دنيا ياما فيكى ياما

وياما فيكى وبس كفى

آه من جفاك .. خليت شنو

انا شان رضاك

يا العمرو قلبك ما رحم

انا شفت ناس ظالمين كثير

بس انت اظلم من ظلم

[اسامه]

الماضى


وجايى تفتش الماضى ؟

خلاص الماضى ولىَّ زمان ،

وجفت مقلتى الباكية ..

ونامت من سنين أحزان ،

وجاى تفتش الماضى ؟



**

أرجع بالزمن مرة وأتذكر حكايتى معاك ..

تلاقى القصة – جد – مره

هل راعيت شعور مضناك؟!

كلما تزيدنى فى هجرك

أقول ليك زيدنى ما أحلاك

لا شفع التوسل فيك .. ولا حرمانى يوم هماك

وجاى تفتش الماضى ؟

وجيت تترجى بالدمعات...

أسامحك أنسى أغفر ليك ؟

جفف دمعك الغالى ..

مسامحك وما عشان عينيك..

عشان تتعلم الغفران..

وتصفح لو زمن جار بيك

وحاول لو قدرت كمان

تقدر رقة الحابيك

وجاى تفتش الماضى ؟

وعزة نفسى مابيه على

أسلم قلبى ليك تانى..

سنين الهجر بيناتنا

وحاجات تانية حاميانى

ولو رجع الحنين وعاود

وليك من تانى ودانى

ولو مكتوب ليَّا تانى أحب

بحب إنسان يكون تانى

[اسامه]

القمري في صباحك

القمري في صباحك اهز الروح نواحك
اسل الروح نواحك
لوتقدر تجامل لو عايز تجامل
رسل لي جناحك

رسل لي جناحك لي يوم ما بزيدو
اسافر بيه وامشي لي زولي البريدو
ابل في الشوق في قربو وجيش الهم ابيدو

لو جاك يوم عزولنا وشوش ليك خايف
عايزك تابا لي وتحرمني الجناح
عارفو حسود و جاهل وما بدور لي نجاح

لو قال ليك بسرقو وبمشي بعيد و ينجع
يسكن جم حبيبو وما منظور دة يرجع
بحلف ليك بربي و قوتك عيشة عيشة
ارجع ليك جناحك كامل ريشة ريشة
و ما بسرق جناحك وما بكتم صراحك
لي لحظات فريدة وعايز يوم اعيشا

[اسامه]

أبوى

أبوى انشاء الله لي تسلم
ابوي يالطيب الانسان ويا دراق
سيوف الهم
حنين كلك سماحه وفال
وفيكا مهابة الابطال
والقلب الكبير يا يابه
فيهو براءة الاطفال
ملان حنيه يا يابه
واراده تفتت الصخره
وعامر ديمه بالإيمان
وزى الوادي فى الصحراء
تدل التائهه الطشه
وتبقى قداحه للضيفان
تعشى اللسه ما اتعشى
ابوى قادوس سواقى النيل
ونخلاتن تهش للدنيا شاربات
همبريب الليل
سديد رايك أبويا يا أب راي

ويالقلبك تملى معاي
ومهما اقول عليك من قول
ابوى ما بيوفي ليك غناي

[اسامه]

ست اللهيج السكري

كلمات حسن الزبير

ست اللهيج السكري
إنتي الجمال بتسكري
وجوه القلوب بتعسكري
صاحب الصبابة توكري
وليك بي رحالو تكركري
طاش نومي ياناس بنكري
ونام الحسود بالدكري
ببراءة تصطادي البريء
وترديه وإن سألوك بري
هيابة تهري الجوف هري
وفي قلوبنا إسمك تمهري
أمشي الهوينا اتمهلي
وهزي القوام السمهري
خلي العزول اتجاهلي
وهاك قلبي ليك تستاهلي
يا الرايقة حامد وتشكري
وفي الجبرة ما بتتشكري
كدا مرة أرسي وفكري
وإخلاصنا ليك ما تنكري
يالفقتي كل تصوري
وكيف حالي ما بتتصوري
المتلي لو كان بنطري
ما بس سطر بتسطري

[اسامه]

الشبه باين
كلمات حسن الزبير

أعاين ما الشبه باين
وعايدة القمرة لي أصلها
كبرنا وكبرت احزانا
وإنتوا كبرتوا وزدتو حلا
وزي ما القمرة تبدأ هلال
جمالك إنتي يومي يهل
ومحيك بدرو يتجلى
ويزيد قجة ويوج ويول
وعينيك سارحة ما هماها
يكتر سهري ولا يقل
صباحك إنتي حقو الناس
يجوهوا يشيلوا منو الفال
صباح البشرى للمحزون
صباح العيد على الأطفال
وطبعك فيه رقة ونفرة
زي طبع الجدي الجفال
وأسألي عن سؤالي عليك
الطير في سماه سألتو
لو لاقيتي يشرح ليك
ما فضلت غير أسرح
واناديك وأشابه قيس
وكل عيون أعاين فيها
بينا وبين عيونك أقيس
وكل نغم سمعت نداه
وكل خطاوي جاية تميس
أقول إنتي وخلاص بنتي
وأبشر زي كأني عريس

[اسامه]

حبان قساى

(*) حبان قساى نسو وعلى قليبى قسو
والريح مشت من غير تشتهى نفسى
واصبحت زى شدرا الخريف منسى
عدمان صفق لا موجود لا فيهو ضل لا عود
الناس تصابح العيد وانا بالحزن موعود
سديت دروب الريح راجى الليالي تعود
رسلت ليكم ناس حملتهم اشواق
وتحية من قلباً لى قلبكم مشتاق
وهديه من إنسان حساس مشاعرو دقاق
ده من هواكم يوم ما شغلتو الارزاق .

(*) كلما سألت عليك بقولو مشغولة
آيه شاغلك عنى ورينى يا زولة
ما السكة لى دربك طوالى مقفولة
وان تهت فى حبك تبقى انت مسئولة
رسلت ليك انسان جاب ليك خطاب منى
وضحت فيهو كتير وشرحت كيف إنى
محتاج ومشتاق ليك يا ملهمة فنى
رد الخطاب ما جاء خيبت لى ظنى
ما انت من اهلى ومن جيرتى وناسى
شمتى فينى الناس جرحتى احساسى
كان العشم القاك بس قلبك القاسى
جرّح على قلبى واجج نفور ناسى .

(*) افتقدتك يا صبا عمرى وشبابى
افتقدتك لما زاد الشوق عذابى
افتقدتك فى غيابى وفى اغترابى
وافتقدت الإبتسامة والعيون الساحرة
يوم يسحر كلامها يا حبيبة عمرى فى الدنيا وزحامها
اكتبى لى عن سنينك كل يو وايام تمر بتزيد حنينك
اكتبى لى عن مشاغلك قولى لى عن أى شئ فى الدنيا شاغلك
وأى زول فى الدنيا لو سألك علىّ قصدو يعرف آيه علاقتك انتى بيه
قولى باكر ايوه راجع جاى ليّ .

[اسامه]

يقولوا iiمشغوله



كلما سألت عليك يقولوا مشغوله


ايه شاغلك عنى ورينى يا زوله


مالسكه لي دربك طوالى مقفوله


وان تهت في حبك تبقى انت مسئوله


رسلت ليك انسان جاب ليك


جواب منى


وضحت فيهو كتير


وشرحت كيف انى


محتاج ومشتاق ليك


يا ملهمه فنى


رد الخطاب ما جاء


خيبت لي ظنى


ما انت من اهلى


ومن جيرتى وناسي


شمتى فينى الناس


جرحتى احساسي


كان العشم القاك بس


قلبك القاسى


حرج على قلبى واجح


نفور ناسي

[محمدعبدالله]

الاخ اسامة السلامة عليكم،، تصحيح اغنية زهرة السوسن من اشهر اغاني الاستاذ الراحل المقيم : عبدالله الحاج وليس كمال ترباس هو صاحب الاغنية وهي فعلا من كلمات الاستاذ :عبدالعال السيد.... ونرجو تحرى الدقة...وشكرا ودمتم.

[اسامه]

الاخ اسامة السلامة عليكم،، تصحيح اغنية زهرة السوسن من اشهر اغاني الاستاذ الراحل المقيم : عبدالله الحاج وليس كمال ترباس هو صاحب الاغنية وهي فعلا من كلمات الاستاذ :عبدالعال السيد.... ونرجو تحرى الدقة...وشكرا ودمتم.

مشكور اخي محمد علي هذا التنوير والله يكرمك

[أستاذ أمين]

تسلم ياغالي